حكاية عصا

-حكاية عصا-
على خلفية الأزمة اللبنانية.....

من قبل أربع...أو خمس تِيّام..----تطلّعت بالضيعة قبل ما نام

و قْشعت فوق المنظر المشروح----ساحر عجيب بيشبه الأصنام

خيلو قمر...خلفو الفضا مفتوح----دربو جمر..و الغيم لفّو حرام

بإيدو عصا كيفما وهجها يلوح----يصغر بعيني الرسم و الرسّام


و هوّي و صار يغيب بالغيمات----إلا و حدّي هالعصا توقع..!

و مْسكتها..و ما فْهمت عالنقشات----إلا... عيون...و خط..و مربّع

و سطور... محفورة متل آيات----و مسكة دهب عم ترهج و تلمع

و بلّشت مرّقها على الصخرات----يوعى الزهر..عم يسمع و يقشع

و صوب الضّبع هِزّا خمس مرّات----يجمد شويّ ...و ينقلب ضفدع


وساعة زمان ..مْرقت عا بستان----و صارت تنوفر هالعصا ألوان

تاانشق زورق من خشاب التوت----و فجأة انتصب ...حسّونها ربّان

قلتلّو... صارو النوايا خوت!!----خدني عا جنة... إسمها لبنان

و ضلّو يقدّف... ما يْهاب الحوت----و الموج يلوي المركب السكران

و صارت شوية... تقترب البيوت----لكن على غفلة بلا استئذان...

تكهرب المشهد و احترق السكوت----و قْشعت عالشاطي أمير الجان

من الآخرة... جايي على بيروت----و ساحب بضهرو الريح و الحيتان


وْقفت عْلى دربو متل شي قيصر----و صارت علينا الناس تتجمهر

و قلْتلّو... يا قادر عْلى النير----تا نشوف كنّك عالسحر أقدر..

والكانت بْإيديه حربة زير...----حوّلتها بإيدو غصن أخضر

ضلّو يْلولح و الجراد يطير----و ما ضل لا أخضر ولا أصفر

سْحرتو قلم... عا قبضة التفكير----بلّش يعبّي... من حبر أحمر

و ضلّو يشدّ عْلى الحرف تا يصير----جرح المصفّى عا حرف خنجر

قْلبتو بسرعة ...زر ورد زغير----بلكي العِرْق بالزّر يتمختر

ما عْرفت بدّو العِرْق سلك يصير----و مين ما دقر بالزّر..يتفجّر


يا ساحر اللي عْطيتني تذكار----ممنون ديّاتك ألف مرّة

فتّحت عينيّي على الأسرار----و بدي الحقيقة اليوم تتعرّا..

انتبهو على لبنان يا أحرار----و خلّو الجبل عالبحر يتمرّا

و قنديل لما ينضب من النار----و العتم يخنق دارنا الحرّة

لا تصدْقو بدو يضوّي الدار----يلّي بيشعل نار.....من برّا


إبراهيم ياسين

 

 

 

 

 

 

 

الاخ الغالي ابراهيم


كلمات نابعة من احساس صادق ومرهف



والله تستحق الاشراف واكثر


تحياااااتي لروعة ما خطّت أناملك يا غالي

 

 

 

 

 

 

 

شوفوا الصور وتعلّموا الأوزان
وبالمنتدى ما في شعر بيموت
ومازال يا مشرف أنت فنّان
عا قلوبنا أدخل بلا استأذان
ولا تدق باب المعرفي تا تفوت
ريحة قصيدك من وحي لبنان


رائع ورهيييب