حورية

-حورية-


من قبل عام بيوم صيفية----عالبحر هبّت ريح بحرية

و الموج سلّم دفتو للريح----و صدفة رمى عالشط...حوريّة


عينين متل الليل جنب الليل----و العطر عم يرشح عا تاني ميل

و تحت الخصر لولا ما هاك الذيل----ما بقول سمْكة..بقول جنيّة


و صرْخت:بحقّ الكون يا صياد----خلّي النوايا بعاد عنّي..بْعاد

قلْتلها...البدّو شِعر يصطاد----لا ترفعيلو السور.. للنيّة


و شو قصتِك يا مجرّحة العينين؟----شايف حزن ما بْيوسعو بحْرين

قالت:..ان بحكي..بيركعو برجيْن----عالضاع منّي و انكسر فيي..


بسابع بحر.. بيّي على الديباج----بالقصر عم ينزف بدون عْلاج

و ان راح بدو يروح منَو التاج----و يصير وقتا البحر..بريّة


و هونيك قالولي مْلوك الجان..----مالو دوا..غير دم شي انسان

و من يومها عم دور عالشطآن----إبرم و فتّش عا دوا بيي.


تْكهربت لما سْمعت هالأخبار----و صارو بعقلي يسبجو الأفكار

و قلتلها: شوفي يا "شلمندار"----رح خبرك هالكم خبرية..


حق الضيافية عم يدعيني----كرمال بيِّك جيب سكّينة

و إقطرلِك من الجرح قنّينة----و سكّر عليها و سلمِك هيي


لكن بدمّي مدوّب الإحساس----و شو الفايدة يحكم ملك بالناس..

عايش عا دم الشاعر الحساس----لا بطش..لا سطوة..لا قويّة


و هيدا اللي دمّو بدون زوّادة----و هيداك دمّو سكّر زيادة

و هيدا عروقو بتخن هالوادي----من دون نقطة دم حنيّة


يعني ان برمتي آخر البلدان----هيدي حقيقة خالق الأكوان

حتى يضل النقص بالإنسان..----كل دم ..لازم يحرمو هديّة


من هيك رح دلِّك على بستان----أخضر مستّف من أرز لبنان

دغري اقطعيلك شي غصن حرزان----و روحي اسْكبي دمّاتنا سْويّة


إبراهيم ياسين-12\7\2008

 

 

 

 

 

 

 

يا شاعر اللي عطيت حورية ********** رقة ولطافة ودمك هدية

عنها أنا رح قول يا خيي ********** بذوقك وعاطفتك وإحساسك

* * * * * * ** * دوختني ودوختها هي * * *****

*/*/*/*/*/*/
الله يعطيك العافية على القصيدة الرااااااائعة يا إستاذ ابراهيم


يعني ببساطة هذه قصيدة منزانة على ميزان الإحساس ومكتوبة بحروف العاطفة الوطنية الجياشة على يد أحد ارزات لبنان الشامخة

*/*/

ذكرتني طريقة هالقصيدة الحلوة بقصائد بو روكز _ الله يرحمو _ وقصائد بو ربيع _ الله يطول بعمرو

*//**//*/*

كما إنو _ ومدري ليش _ ذكرتني بقصيدة نتالي للشاعر الراااااااااااائع شادي موسى ( منوجهلو تحية )

على كل حال :

قصيدتك من أروع ما قرأت أو سمعت ياريت ما تحرمنا من هيك قصائد
والله يزيدك من كنوز الإحساس والعاطفة


بكل المودة ....